وزیراعظم شہباز شریف نے ایرانی صدر مسعود پزشکیان کے ہمراہ مشترکہ پریس کانفرنس میں پاکستان کے مؤقف کو دوٹوک انداز میں پیش کرتے ہوئے کہا کہ پاکستان، ایران کے پرامن جوہری پروگرام کی مکمل حمایت کرتا ہے۔ انہوں نے کہا کہ ایران کو پرامن مقاصد کے لیے جوہری قوت حاصل کرنے کا پورا حق حاصل ہے اور پاکستان اس حق کے تحفظ کے لیے ایران کے ساتھ کھڑا ہے
اسرائیلی جارحیت کی شدید مذمت
وزیراعظم نے اسرائیل کی جانب سے ایران پر جارحیت کو بلا جواز اور قابل مذمت قرار دیا۔ انہوں نے کہا کہ ایرانی قیادت نے دشمن کے خلاف دلیرانہ فیصلے لیے اور عوام و فوج نے ثابت قدمی سے مقابلہ کیا۔ جنگ میں شہید ہونے والوں کے لیے دعائیں اور زخمیوں کے لیے نیک تمناؤں کا اظہار بھی کیا گیا۔
فلسطین اور کشمیر کا ذکر
وزیراعظم نے فلسطینی عوام کے ساتھ یکجہتی کا اظہار کرتے ہوئے کہا کہ غزہ میں فوری سیزفائر ضروری ہے، اسرائیل خوراک کو ہتھیار کے طور پر استعمال کر رہا ہے۔ انہوں نے کہا کہ دنیا کو مظلوم فلسطینیوں کے لیے متحد ہونا ہو گا۔
ساتھ ہی انہوں نے کشمیر کی صورتحال کو بھی غزہ سے مماثل قرار دیتے ہوئے کہا کہ وادی کشمیر مظلوم کشمیریوں کے خون سے سرخ ہو چکی ہے۔
ایران کے صدر کا ردعمل اور اہم معاہدے
ایرانی صدر مسعود پزشکیان نے اسرائیل کے مذموم عزائم کو اجاگر کرتے ہوئے کہا کہ غزہ، لبنان اور شام پر حملے خطے کو غیر مستحکم کرنے کی سازش ہیں۔ انہوں نے پاکستان کی حمایت پر شکریہ ادا کیا اور کہا کہ امت مسلمہ کو اتحاد کی اشد ضرورت ہے۔
انہوں نے علامہ اقبال کی شاعری کو امت مسلمہ کے اتحاد کی اساس قرار دیتے ہوئے کہا کہ پاکستان سے تعلقات ایران کی خارجہ پالیسی کا اہم جزو ہیں۔
دوطرفہ تعاون کے نئے باب
اس ملاقات میں پاکستان اور ایران کے درمیان کئی اہم معاہدوں اور مفاہمتی یادداشتوں (MoUs) کا تبادلہ ہوا، جن میں شامل ہیں:
سائنس و ٹیکنالوجی اور انفارمیشن ٹیکنالوجی کے معاہدے
ثقافت، سیاحت، میٹرالوجی، موسمیاتی تبدیلی اور قدرتی آفات سے نمٹنے سے متعلق مفاہمتی یادداشتیں
میری ٹائم سیفٹی، فائر فائٹنگ، عدالتی معاونت اور اصلاحات پر بھی معاہدے
فری ٹریڈ ایگریمنٹ پر عمل درآمد اور مصنوعات کے معیار سے متعلق مشترکہ بیانات
Leave a Reply